16/3/09

Novo equipamento da nosa Biblioteca

Desde agora, a nosa Biblioteca incorpora a tecnoloxía da información en beneficio dos seus usuarios (e xa era hora, dirá alguén, con razón).
Desde a semana pasada dispoñemos de tres ordenadores con acceso a internet, que poderán ser empregados por todos os usuarios, en condicións que o Equipo de Biblioteca, en colaboración co Equipo TIC do Centro, establecerá en breve. Estes recursos engádense á rede wi-fi de que disfrutabamos ata agora, pero que estaba a ser pouco utilizada, dado que ata este momento ningún alumno acudiu á Biblioteca cun ordenador portátil.
Instalamos tamén un proxector de vídeo suspendido no teito xunto cunha pantalla despregable e un equipo de son 5.1. Preténdese así que a Biblioteca sexa un espacio apto para a comunicación audiovisual. O Equipo de Biblioteca xa lle está dando uso: durante os recreos, os usuarios poderán observar breves presentacións temáticas, acompañadas de música suave. Esta actividade comezou a semana pasada, e continuará esta, coa serie de diapositivas elaborada polo , profesor Alfonso Blanco, titulada O libro en Occidente; a audición que a completa é a da peza Gnossienne no. 1 de Erik Satie. Esta iniciativa está aberta a todos aqueles que queiran elaborar materiais deste tipo, que cremos contribúen a crear un ambiente apto para a lectura, o estudio, ou o ocio cultural.
O Equipo de Biblioteca quere agradecer especialmente o asesoramento e colaboración do Equipo TIC á hora de planificar e levar a cabo esta importante mellora no noso espacio.
A seguir amosámosvos en fotos o aspecto que ten agora a nosa Biblioteca:


A CULTURA É O CAMIÑO VITAL DO SER HUMANO

No hay comentarios: